Saturday, August 18, 2012


India President thar
Pranab Mukherjee
.
                         Pranab Mukherjee hi Kristian a ni lo a, amah atang hian Thlarau lama hlawkna beisei tur em em a awm hran lo ang. Amaherawhchu hmanni lawk khan India ram hotulu ber President of India atan thlan tlin a ni a. Kan ram hruaitu lu ber chanchin hi hriatzauna angreng atan han ziak ve leh ngawt mai teh ang.
                Pranab Mukherjee hi Bengali chhungkua atangin khatihlai, British hunlaia Bengal Province-a Mirati khuaah December 11, 1935 khan a lo piang a, a pa chu India-in Independence a sual laia tha nasa taka lo thawh ve thintu leh kum 1952-1964 chhunga West Bengal Legislative Council member lo ni thin Kamada Kindar Mukherjee-a a ni a, a nu chu Rajlakshmi Mukherjee a ni.
                A pa Kindar Mukherjee-a hian a fapa pawh hi a hnungzui a, Politics la luhchilh turin a duh hle a, chutiang zawng chuan a kaihruai nasa hle thin. Pranab-a hian University of Calcutta hnuaiah lehkha a zir char char a, Suri Vidyasagar College ah lutin a hnuah Unioversity of Calcutta atang hian Political Science leh History subject atangin M.A. a zo va. Hemi hnu hian dan lam zirin University of Calcutta atang bawk hian L.L.B a zir zo leh bawk.
                Double M.A leh LLB degree nei nimahse a hna hmasa ber atan Deputy Accountant General (post and Telegraph) Office, Calcutta-ah UDC hna a thawk a. Hemi hnu hian kum 1963 khan Vidyanagar College-ah Political Science Lecturer hna a thawk leh a, hetih rual hian Journalist niin Desher Dak chanchinbu-ah a thawk pah bawk.


                Politics lamah: Kum 1969 khan Pranab Mukherjee hian Indian National Congress a zawm a, Politics a luhchilh rual hian Midnapore Bye Election-ah Krishna Menon chu hlawhtling takin a campaign pui nghal a ni. Politics-a a talent hi Prime Minister hlui Indira Gandhi khan a lo hmuh hmaih hauh lo a, tichuan July, 1969 khan Rajya Sabha MP tur thlannaah seat pein thlan tlin a ni nghal a, hemi hnu kum 1975, 1981, 1993 leh 1999 ah te MP atan hian thlan tlin a ni leh a ni.
                Mukherjee hi Indira Gandhi lamtang rinawm tak mai a nichho nghal a, Indira Gandhi pawhin a duhsak hle. Kum 1973-a a cabinet a siksawiah Indira chuan Pranab-a hi Union Deputy Minister of Industrial Development hna a chelh tir a. Hetianga Politics-a mi thar nisi hma a sawn chak em em mai hi khatih hunlaia Indian Politics titi a tling pha hial a ni. Hetianga dinhmun pawimawh tak atang hian  kum 1982 leh 1984 inkar chhung khan dinhmun pawimawh zawk Finance Minister of India hna chelh tura ruat a nih leh a. Finance Minister a nih chhung hian hmingchherna khawp hna tam tak thawkin India in IMF Loan a rulh theihnan hma a la a, tuna Prime Minister nimek Manmohan Singh-a hi a thatna hmuin Reserve Banck of India (RBI) Governor atan a ruat bawk.
Indira Gandhi thah a nihkhan India sawrkara tlatlum tak Pranab Mukherjee-a dinhmun pawh a ti derthawng hle. Prime Minister thar tur an han dap a, Indira thachhangdawltu anih avanga a lo inbeisei ve em em laiin INC lam chuan politics-a expirience la nei tlem tak Indira fapa Rajiv Gandhi chu an thlang ta mauh mai. Hei hian Pranab-a pawh a ti lungnilo hle a. Tichuan PRanab-a chuan party thar Rashtriya Samajwadi Congress chu kum 1986 khan West Bengal-ah a din ta a ni. (Kum thum hnuah Congress nen an inzawm leh)
                Kum 1991 a Rajiv Gandhi thah a nih veleh hnu khan India ram Prime Minister thar P.V. Narasimha Rao chuan Pranab-a hi Planning Commission-ah Deputy Chairman atan a ruat a, a hnuah kum 1995-1996 chhung khan External Affairs Minister atan a ruat leh bawk.
                Pranab Mukherjee hi Gandhi chhungkua tana mi rinawm ni ngaih a ni reng a, hreh tak chunga Sonia Gandhi Politics-a a luh theihna atana hmala tu pawimawh ber leh a kaihruaitu ber vawiin ni thleng pawhin a ni a, chuvangin INC in President atana a vawrhchhuak pawh kha thil awmlo ani lem lo. Sonia Gandhi-in kum 1998-99-a Congress President nihna a chelh atangkhan Pranab-a pawh hi AICC General Secretary atan ruat a ni.
                Kum 2004 atangin Lok Sabha House Leader a ni a, Manmohan Singh-a Prime Minister-na hnuaiah pawh Minister rintlak leh pawimawh ber nihna a chelh reng a, Defence, Finance leh External Affairs te a lo enkawl tawh a ni
                Office pawimawh a chelh tawh te: Sawi tak angin Pranab Mukherjee hi pa rintlak tak leh Politics thiam tak mai a ni a. Hei vang hian Politics-a a bul tanna Indira Gandhi hunlai ata tawh, vawiin ni thlengin India ram pa rawnkai ber pawl a ni a, duhsakna nasa tak a dawn bakah amah hi mi fit tak anih avangin sawrkar laipuiah hna pawimawh tak tak a lo chelh tawh a, a then a zar i han tarlang teh ang.
                Commerce Minister:  Pranab Mukherjee hian tum thum lai mai Commerce Minister hna hi a lo chelh tawh a. A hmasa berin kum 1980-82 chhung khan he hna hi a chelh a, kum 1984-ah he hna bawk hi chelh lehin a vawithumnan kum 1990 khan Commerce Minister hna chelh lehin hei chhung hian World Trade Organisation din a nihtheihnan a thawhhlawk hle.
       Defence Minister: Pranab-a hi kum 2004-a Congress an sawrkar khan Defence Minister atan Sonia Gandhi chuan a ruat a, he hna hi kum 2006 thleng a chelh. He hna a chelh chhung han US nen thawhdunna tha tak a siam a, US pawhin Mukherjee-a hi an fak hle.
                Foreign Minister: Kum 1995 khan External Affairs Minister atan ruat a lo ni tawh a, he hna hi 1996 thleng a chelh. Kum 2006 khan External Affairs Minister hna hi a chelh leh. A term hmasa zawk chhung hian hetih laia Prime Minister PV Narasimha Rao-a hunlaia duan Look East Policy-a hmanrua pawimawh tak atan ASEAN member ram te thawhhona thuthlung tha tak a siampui a. Kum 2006 atanga he post a chelhleh chhung hian India chuan US nen Nuclear thuthlung, Indo-US Nuclear Deal hlawhtling takin a sign a ni.

Finance Minister: Pranab Mukherjee-a hi India ram Finance Minister atan a hmasa berin kum 1982 khan ruat a ni a, he a term hmasa ber hi sum leh paia sawrkar laipui dinhmun siamthat a nih avang leh Manmohan Singh-a RBI Governor atana ruat anih avangin chhinchhiah tlak tak a ni. Hei lo pawh, kawngdang tam taka Finance inister hna hmingtha taka a chelh avangin khawvela Finance Minister tha ber nihna Euromoney Survey chuan a hlan a, heti chung hian Rajiv Gandhi khan he hna atang hian a chawlh tir ta tho a ni.
                PV Narasimha Rao-a hun a rawn inher chhuah leh kha Planning Commision-ah Deputy Chairman atana ruat a ni a, hetih chhung hian tuna Prime Minister Manmohan Singh-a hi Finance Minister atan lakluh a ni thung a hei hi Indian Econoy-a thil chhinchhiahtlak tak a tling a ni.
                Tichuan kum 2009 khan Pranab-a hi Finance Minister atan lakluh a ni leh a, he hna a chelh leh chhung hian chhiah lak chungchangah nasa takin kalphung a thlak a. Fringe Benefits Tax leh Commodities Transaction Tax te chu tibo vin Goods and Service Tax a la thung a. Chubakah Scheme hrang hrang JNNRUM telin sum a pek belh a, zirna leh hriselna lam budgetah te sum dah pungin hmasawnna tam tak a Finance Ministerna hnuaiah hian India chuan a hmu a ni. Hetianga hna a thawh that em avang hian kum 2010 khan World Bank leh IMF in chanchinbu an siam Emerging Markets chuan “Finance Minister of the Year atan a thlang a, fak a hlawh hle.
                Hna pawimawh dang: A chunga kan tarlan bakah hian rampum huapin nihna pawimawh tak tak Pranab Mukherjee-a hian a lo chelh tawh a. Indian Statistical Institute, Kolkatta-ah Chairman niin Rabindra Bharati University-ah Chairman leh President hlui a lo ni tawh bawk. Heng bakah hian heng ahnuaia hna pawimawh tak takte hi a lo chelh tawh bawk;-
Union Minister of Industrial Development 1973–1974
Union Minister of Shipping and Transport 1974
Minister of State for Finance 1974–1975
Union Minister of Revenue and Banking 1975–1977
Treasurer of the Congress Party 1978–79
Treasurer of the All India Congress Committee 1978–79
Leader of the House of the Rajya Sabha 1980–85
Union Minister of Commerce and Steel and Mines 1980–1982
Union Minister of Finance 1982–1984
Board of Governors of the International Monetary Fund 1982–1985
Board of Governors of the World Bank 1982–1985
Board of Governors of the Asian Development Bank 1982–1984
Board of Governors of the African Development Bank 1982–1985
Union Minister of Commerce and Supply 1984
Chairman of the Campaign Committee of Congress for conducting national elections to Parliament 1984, 1991, 1996 and 1998
Chairman of the Group of 24 (a ministerial group attached to IMF and World Bank) 1984 and 2009–2012
President of the State Unit of Congress Party in West Bengal 1985 and 2000–10
Chairman of the Economic Advisory Cell of the AICC 1987–1989
Deputy Chairman of the Planning Commission 1991–1996
Union Minister of Commerce 1993–1995
Union Minister of External Affairs 1995–1996
President, SAARC Council of Ministers' Conference 1995
General Secretary of the All India Congress Committee 1998–1999
Chairman of the Central Election Coordination Committee 1999–2012
Leader of the House of the Lok Sabha 2004–2012

Union Minister of Defence 2004–2006
Union Minister of External Affairs 2006–2009
Union Minister of Finance 2009–2012
President of India on 25 July 2012.

India ram President-ah: Kan hriat theuh angin UPA chuan mi hrang hrang a buk kual hnuin kum 2012 President thlanna atan Pranab Mukherjee hi a vawrhchhuak a, P.A. Sangma nen President seat hi an in chuh anih kha. He inthlanah hian vote 7,13,763 lai hmuin chiang takin thlan tlin a ni a, July 25, 2012 khan India ram president 13-na ni turin Chief justice of India chuan a la lut ta a ni.



Mimal nun: Pranab Mukherjee hian July 13, 1957 khan Suvra Mukherjee chu nupuiah neiin fapa pahnih leh fanu pakhat an nei a. A fapa Abjijit Mukherjee chu West Bengal MLA a ni a, a fanu hi lamthiam niin Kathak Dancer a ni
Pranab Mukherjee hian lehkhabu pawh panga lai a ziak tawh a, chungte chu- Midterm Poll –1969, Beyond Survival: Emerging Dimensions of Indian Economy – 1984, Off the Track –1987,Saga of Struggle and Sacrifice –1992 leh Challenges Before the Nation (on Indian National Congress)- 1992 te an ni.


Chawimawina: Pranab Mukherjee hian a hnathawh that avangin chawimawina chi hrang hrang a lo dawng tawh a, a zavai chuan kan sawiseng awm lo ve. Kum 1984 khan Euromoney Magazine chuan khawvela Finance Minister tha ber atan a lo thlang tawh a, kum 2008 khan India rama Civil mite chawiawina sang ber dawttu Padma Vibhushan a lo dawng tawh bawk. kum 2010 khan World Bank leh International Monetary Fund (IMF) chanchinbu Emerging markets chuan Finance Minister of the Year for Asia atan a lo thlang tawh bawk. Hemi kum vek hian The Banker chuan Finance Minister of the Year atan a thlang ve bawk a ni. Hei bakah hian kum 2011 khan University of Wolverhampton chuan Mukherjee-a hi Doctor of Letters degree an lo hlan tawh a, Assam University pawhin kumin March thla khan honorary D.Litt degree an pe bawk a ni.


2 comments:

  1. I thuziah chhiar a nuam thin khawp mai, Makedonia ami pawh hi ka lo chhiar ziah thin. (Y)

    ReplyDelete
  2. Onistle0prud-wo1978 Katie Harris Download
    neckpakligfharg

    ReplyDelete