MISSION AVIATION FELLOWSHIP (MAF)
Kum 1940 chho, Indopui Pahnihna lai vel khan ral ram beia lo haw hlim Pilot thenkhat te chuan indo kar lakah Bible Study te, tawngtai hona hun te an hmang thin a. Indopui zawh hnua thlawhtheihna hmanga Pathian rawngbawl dan tur chu an tui puiin an sawi ho nasa thei hle. Chutianga hmala tur chuan Pathian rawngbawl leh Chanchin Tha puandarh lama thahnemngai tak tak Pilot engemawzat chu an in tuk khawm ta. Tichuan US pilot Jim Truxton, United Kingdon pilot Murray kendon leh Edwin Hartwing, Australian Pilot te chu anmahni ramah theuh haw in thlawhna hmanga rawngbawl tur pawl an din ta theuh a.
Heng zingah hian US-a din Christian Airmen’s Missionary Fellowship (CAMF) chu thlawk chhuak hmasa ber niin he pawl hi a hnu zelah Mission Aviation Fellowship (MAF) hi a lo ni ta a ni. Kum 1946 khan pilot Betty Greene chuan MAF anga an thlawhtheihna hmasa ber chu a thkawhchhuah pui a, hemi tum hian Wycliffe Bible letlingtu te chu Mexico ramhnuai a hnam mawl te zinga thawk turin a phur chhhuak a ni.
US ang bawkin UK leh Australia-ah te pawh MAF hi din a ni a. UK ah chuan Kristian Outreach programme pakhat Mildmay Movement peng pakhat anga kalpui a ni a, a hnuah amahin a ding hrang. He hmalaknaah hian Murray kendon chu a sulsutu ber niin a thian dangte tawiawmna nen MAF-UK chuan Central Africa-a rawngbawl dan tur ngaihtuahin Sudan ram chu kum 1950 khan an luhchilh a, Africa ram hrang hrangah an in zar pharh chho ta zel a ni.
Australia ramah pawh June 30, 1947 atang khan MAF chu Edwin “Harry’ Hartwig a leh a thian Pilot dang te’n dinin kum 1949-a thlawhna pakhat de Havilland ‘Tiger Moth’ aircraft an lei hnu chuan Australia hmarlam leh New Guinea thliarkara rawngbawl dan tur an thli thlai tan a. Kum 1951-ah MAF-US mi leh sa Bob leh Betty Hutchins te nen New Guinea chu luhchilhin Madang-ah an inkulh a, mahse Aug 6, 1951 khan MAF-Aus sulsutu Edwin Hartwig hi thlawhna chesualah thiin midangin rawngbawlna hi an chhunzawm zel a, MAF-US nen tangkawpin Papua New Guinea leh Dutch New Guinea (tunah chuan Papua, Indonesia) ah te in zarpharhin Australia ram laili zawk te pawh an luh chilh tel ta zel a ni.
Hetianga anmahni tawka rawng an bawl ve bek bek lai hian khawvelin MAF rawngbawlna a rawn hriat lar chhoh tan na chu MAF-US Missionary Pilot Nate Saint leh a rawngbawlpui te kum 1956-a Ecuador rama Auca Indians hovin an thah kha a ni awm e. Hei hi chhuak hmasa lamah kan ziak tawh) Hemi chungchang hi hetih hunlai a chanchinbu lar Life Magazine chuan tichhuakin khawvelin a ngaihven hle a, Nate Saint, Jim Elliot etc te martar-na hian mitam tak hnenah chona pein an chhungte ngeiin anmahni thattu Aucas ho hi luhchilhin Kristianah an siam leh vek nghe nghe a nih kha. He thil thlen hnu hian MAF chuan New Zealand, South Africa, Finland, the Netherlands, Sweden, Norway, Denmark, Brazil, Mexico leh Canada hmun hrang hrangah te rawngbawlna an zar pharh zual zel a, vawiinah chuan rawngbawlnaa thawhhlawk ber te zing ami an ni ta a ni.
Engtin nge rawng an bawl? : MAF hi World War II laia Pilot ten thlawhna hmangtangkai a rawngbawlna pawl an din a nih thu kan sawi tawh angin ram hrang hranga Chanchin Tha la hre lo te hnenah rawng an bawl a. Missionary Pilot te hi hmun chhengchhia leh ramhnuai pik tak hmunah te an thlawhna hmanga thlawk lutin hnam tlawhpawh loh te an tlawh chhuak a, ranwgbawlna ki peng pawimawh tak tihdam hna lamah pawh hma lain Doctor, Nurse leh Damdawi chi hrang hrang an phur lut thin a ni. Khuarel chhiatna chi hrang hrang tuilian, khawkheng, lirnghing, tam etc thlenna hmunah te tanpuina hna thawktu leh eitur chi hrang hrang phur lut thinin heng khuarel chhiatna te’n kalkawng an tih chhiatna hmunah phei chuan MAF hi an tangkai thei hle a ni.
MAF hian thlawhna a mihring leh bungrua phurhluh mai bakah an rawngbawlna hmunah te Missionary mi thiam tak tak te hmangin khawtlang nun chawikanna lamah hma nasa takin an la bawk. MAF hian hmun thenkhatah Ni zung chakna hmang(Solar Energy) project te, Tuichhunchhuah siam sak te, huan leh thlai leh ranvulh dan tha zawk zirtirna kawngah te hma nasa takin an la bawk a, heng hmunah te hian inbiakpawh tawnna kawngah te an rawngbawlsakte ti changtlungin radio leh internet service te an siam sak bawk thin a ni.
Heng rawng an bawlnaah hian a ram mi beiseiawm deuh te chu Pastor le evangelist atan te training an pe thin a, Bible leh leadership lamah zirtirna an pe bawk thin. Tin, MAF hian Bible lehlin lamah te hma lain lehkhabu tha tak tak te an thawn lut bawk a, kohhran din chhoh zel anih theih nan hma an la thin bawk a ni. MAF hian hnam mawl tak tak te chu an Airbase a thawk turin Aircraft mechanic atan te, inbiak pawh tawnna leh office enkawl atan te training pein eizawnna kawng an hawn sak bawk thin a ni
MAF hian hetiang kawng hrang hrang hi hmang tangkaiin Chanchin Tha hril chung zelin hna nasa tawkin an thawk a. Kum 2004-a Tsunami rapthlak tak te, Nicaragua-a Hurricane Felix tleh tum te, Bangladesh ram Cyclone Sidr-in kum 2007-a a nuai tum te kahn MAF hian an hming an lo chher hle tawh a. Tunah hian MAF te hian lirnghingin a sawisak Haiti ramah te leh Democratic republic of Congo-ah te hmanasa takin an la bawk
Accidents : Hetianga hmun hrang hranga thlawhna hmanga rawng an bawl naah hian MAF hian chhiatna a tawng ve nual tawh a, MAF Cessna 185, de Havilland Canada DHC-6 Twin Otter 200 te, de Havilland Canada DHC-6 Twin Otter 300 te Cesna 206 te, GA8 Aircraft te chu a lo chesual tawh a, hengah hian Pilot Missionaries John Haverson, Chris Hansen, Richerd West, Hadleigh Smith, Nate Saint etc leh missionary dang tam tak te chu heng chhiatna avang hian an lo martar tawh bawk a ni.
MAF hian hetianga hautak tak leh rinna a rawng an bawl theih nan hian mi inphalte thilpek ah an innghat thui hle a. Para Church organisation lar tak tak OM, Samaritans Purse, CONCERN, Campus Crusade for Christ, Christian Aid, leh kohhran leh pawl hrang hrang 600 chuang nen an thawkho mek a, Ram hrang hrang 55-ah rawngbawlna neiin an bung mek a, an rawngbawlna hmanrua ber thlawhtheihna hi 130 chuang an nei bawk a ni..
 |
| John C. Boyd |
Tunah hian Nampa, Idaho USA-ah hmunpui an nei mek a, Cairns, Australia leh Ashford, UK te chu an hmunpui dang te an ni. Heng hmunpui atang te hian rawngbawlna ki peng dang dang khawvel hmun hrang hrang ami te enkawlin tuna MAF President leh CEO nimek chu John C. Boyd a ni.
Tunhnaia Open Doors-in Muslim ho chawnghei tawngtai thla Ramadan/Ramzan an hman ruala Kristian, a duh apiang te’n khawvel ram hrang hranga Kristian tihduhdahna tuartu te tana tawngtai sakna hun an buatsaih thu leh tawngtai dan kaihhruaina an siam chungchang chhuah anih avangin chhiartu thenkhat ten Open Doors rawngbawlna hriatchian an duh thu Makedoniaah an rawn thlen a. Chuvangin tun tum chu Open Doors chanchin tawitein i han bihchiang dawn teh ang.
Open Doors hi kohhran bik awmlo a rawngbawlna a ni a, khawvel hmun hrang hranga Kristian tihduhdahna tuartu te tanpui tur leh heng Kristian nekchepna ram hrang hranga Bible thawnlut a, chanchin tha puang darh tu pawl an ni a, an rawngbawlna hi a thang chak in hlut a hlawh chho hle.
Open Doors hi kum 1955 khan Andrew van der Bijl, Brother Andrew ti a hriatlar in a din a ni. Brother Andrew hian Soviet Poland ram bial chhunga Kristian te chu a vei em em a, Communist ram a nih avangin Bible chhiar tur an neih loh bakah inpawlhona te an nei hlei thei thin lo tih a hria a, chuvang chuan henglai biala Kristiante tan hian a rukin Bible a thawnlut ta thin a ni. Harsa tak chungin Bible thawnluh hna hi Soviet ram hrang hrangah a thawkchho zel a, tichuan vanneihthlak takin a rawngbawlnaa a hman atan kum 1956 khan car siamtu lar tak Volkswagen company siam Beetle car chu Brother Andrew-a hnenah pek a ni a, hei hi hmang tangkaiin heng Communist ramah te hian Bible chu a rukin a phurlut ta thin a. He car hian rawngbawlin mel 2,00,000 chuang a tlan kual hman a ni. A car hmang vek hian Bible mai bakah Pathian thu ziahna lehkhabu leh pamphlet te a phur lut tel bawk a, tichuan a rawngbawlna chu thangchho zelin Open Doors chuan Poland leh a chheh vel mai bakah Soviet Union pumpui leh Asia ram te a tuam ta a ni. Kum 1981 khan ruahmanna tha tak Project Pearl tih hmingpuin China rama tuipui kam khaw pakhat Gezhou-ah Chinese Bible maktaduai khat lai chu zan khat thil thuah an lalut a, hei hi Time Magazine pawhin ‘Bold Expedition’ tiin a sawi hial a ni. 1985 khan Latin America lamah pawh Pathian thu ziak lehkhabu hrang hrang million 5 chuang thalaite tan Project Crossfire hnuaiah an thawn lut.
Kum 1988 khan Mikhail Gorbachev-a dan duanchhuah Glasnost chu hmang tangkaiin Russian Orthodox hnenah dollar 2.5 million sengin Russian Bible maktaduai khat an thawnlut leh bawk. Kum 1992 khan China rama kristian leh rawngbawltu hrang hrangte tan Chinese Study Bible chu an tichhuak a, 1993-ah Brother Andrew chuan Albania President hnenah Albanian tawnga Bible hmasa ber chu present in Bible tam tak an thawnlut leh. Kum 1997 khan Open Doors dintu Brother Andrew-a hnenah a hnathawh that avangin The World Evangelical Fellowship chuan International Religious Liberty Award a hlan. Hetianga Bible thawnchhuah kawnga hma an lak nasat avang hian United Bible Societies (UBS) te nen thawk hovin kawng hrang hrangin an in pui tawn a ni.
Open Doors hian kum 2000 chho atang khan Bible semchhuah bakah kawng hrang hrangin hma an la chho a. kum 2002 atang khan kum sarih chhung Prayer Campaign an thlaka, Open Doors hian he campaign zawmtu te chu 2008-a Beijing Olympic neih anih thlengin kum 7 chhung China rama chanchin tha a darh zau zel theih nan a tawntai char char turin beihpui a lo thlak tawh a ni. Kum 2005 khan US thalaite’n khawvel ramdanga Kristiante tan hna an thawh theih na turin Advocacy Program a buatsaih a, hei bakah hian nekchepna rama awmte tawrhna hriatthiampui turin Locked Up Program te an lo buatsaih tawh bawk a ni.
Hetianga rawngbawlna kawng hrang hranga an zauhchhoh zel lai hian kum 2003 khan ChistianToday chuan Open Doors rawngbawlna dinhmun an tarlang a, heta tarlan a nih dan chuan kum 2003 chhung khan khawvel hmun hrang hranga Kristian nekchepa awmte tan Bible million 4 an thawnchhuak a, heng hmuna rawngbawl tur hian mi 20,000 chu Pastor atan an trained chhuak hman a ni.
Tarlan tawh angin tunah pawh hian Open Doors hian Muslim Ramadan neih chhunga ram hrang hranga Kristian nekchepa awm leh tihduhdahna tuartu te, Kristianna avanga in leh lo, chhungkhat te chan a Jail bang zut mekte leh harsatna hrang hrang tawk mek te tana tawngtaina thla, ’30 days of Prayer’ chu an hmang mek a, hemi pual hian tawngtai pui dan tur tarlanna Calendar pawh download theihin an website www.opendoorsusa.org ah dah a ni.
Open Doors hian ram hrang hrang 30 chuangah Office an nei a, an headquarter chu Santa Ana, California, USA niin tuna Open Doors President leh CEO nilai mek chu Dr. Carl Moeller a ni. Tunah hian ram hrang hrang 60 chuangah hmalakna lian tak tak an nei a, hna nasa takin an thawk mek a ni. SOME FACTS
*Open Doors hnuaiah hian OpenDoors USA hi a pui ber leh pawl lianber a ni
*Khawvel hmun hrang hranga Kristian million 100 chuang te chuan tihduhdahna, endawngna, nekchepna leh thahna hial an tawk mek
*Open Doors dintu Brother Andrew hian a chanchin a ziahna ‘God’s Smuggler’ tih lehkhabu a tichhuak a, he lehkhabu hi tawng hrang 36 a lehlin niin copies million 10 chuang hralh a ni.
*Open Doors hian chanchin tha hrilna kawng hi khawi hmunah leh eng hunah pawh a in hawng reng niin an ngai a, an innghahna chu Thupuan 3:8 hi a ni.
*Open Doors hian Kristian nekchep te tan kum 56 chuang hna an thawk tawh a, hetiang kawnga rawngbawltu pawl upa ber an ni.
*Open Doors hian Nov 13, 2011 hian Tawngtaina ni, ‘International Day of Prayer for the Persecuted Church’ chu tihduhdahna leh beihna tawk kohhran hrang hrang pualin an hmang leh dawn.
SAMARITAN’S PURSE
Samaritan’s Purse pawh hi Issue hmasa lama kan chhuah tawh Christian Aid te ang tho a Kohhran leh pawl bik awm lo, mi thahnemngaite’n tisa leh thlarau a rethei te leh indona, retheihna, khuarel chhiatna, tam, hrileng leh tihduhdahna tuar tute tanpuia chhawmdawl tur a pawl din a ni a. He pawl lar leh tangkai tak hi kum 1950 a World Vision dinchhuak tu Dr. Bob Pierce-a’n chhiatna leh harsatna thlenna hmuna chanchintha puanna hun tha chanchintha puangdarh tu pawl hrang hrang leh kohhran lian te tana rawngbawlsak na kawng hawnna remchang atan kum 1970 a a din a ni. A hming ‘Samatitan’s Purse’ tih hi Thuthlung thar a Lal Isua’n Samari mi tha tehkhin thu a sawi a ‘nangmah I in hmangaih ang bawk in I vengte hmangaih rawh’ tih thu behchhana a phuah a ni.
A din tirh lamah chuan Missionary chawm hi an hnapui ber a ni thin a. Mahse khua a lo rei deuh deuh a, Samaritan’s Purse pawh lo thang lian zelin rawngbawlna huang an zauh zel a. Missionary chawm chauh nilo in kawng hrang hranga chhawmdawlna hna leh zau zawka mi te tanpui hna an thawk tan ta ani. Chung an thawh langsar zual zingah chuan kum 1993-a Somalia tualchhung buai vanglai te, Kum 1994 ah Rwanda ram ah te, 1997 ah Sudan ram ah te, Kum 1999 ah Kosovo ah te, Afganishtan Indona kum 2002 ah te leh Iraq indona 2003-ah te khan damdawite a thlawna sem in buaina karah mipui mimir hriselna enkawl lamah nasa takin an in hmang a. Tin, kum 1998–a Hurricane Mitch in a chhiatna nasa tak a thlen tum te, El-salvador lirnghing ah te, 2004-a Tsunami rapthlak takin a ram hrang hrang a nuai tum te, Hurricane Katrina-in America rama chhiatna nasa tak a thlen tum te khan mihring chenna in chhia te sak that sakin tanpuina hrang hrang heng chhiatna tuar tu te tan hian an hlan a. Chaw te sem in damdawi leh thawmhnaw te an sem nasa hle a ni.
Samaritan’s Purse-in a tum ber chu indona, chhiatrupna, hripui leng leh tam tla te avanga mi mangang leh chanhai te hnena tisa lam thil a tanpuina pek mai bakah chumi remchanga la a an thlarau nun chhandam a nih theih nan a heng chhiatna hrang hrang lo thleng te hi chanchin tha puandarh na remchanga hman a a tam thei ang ber Krista hnena hruai a ni.
Samaritan’s Purse hian ram hrang hrang 100 chuangah hna an thawk mek a. USA-a North Carolina state a Boon khawpui ah Headquarter nei in Australia, Canada, Germany, Ireland, Hong Kong, Netherlands leh United Kingdom ah te Affiliated Office an nei a. Field Office pawh khawvel ram hrang hrang 20 chuangah an nei bawk a ni. Samaritan’s Purse hi tanpui hna thawk tih tak ah an sum vir vel pawh a hraw hle a. Kum tin Dollar maktaduai 300 chuang khawih che vel ang an ni a. Chumi atanga 88% chu chhawmdawlna leh tanpuina hna thawh nan hmangin 5% chu inrelbawl nan an hmang a, 7% dang chu sum hailuhna kawng hrang hrangah hman a ni bawk a ni.
Heng tanpuina leh chhawmdawlna hrang hrang Samaritan’s Purse in an kalpui bakah hian he pawl hnuaiah tho hian rawngbawlna ki peng dang tam tak an kal pui bawk a. Chungte chu tawi te te in han thlir thuak ila.
Operation Christmas Child : Christmas thilpek tur North America, Europe, 
Australia a school hrang hrang atanga lakhawm in khawvel ram hrang hranga naupang chanhaite hnenah Christmas Present atan an sem chhawng leh thin.
Australia a school hrang hrang atanga lakhawm in khawvel ram hrang hranga naupang chanhaite hnenah Christmas Present atan an sem chhawng leh thin.Disaster Relief : United States leh Canada ah te Samritan’s Purse hian chhiatrupna lo thlena midangte puitu tur Volunteer Team siamin chung pawl te hnenah chuan hmanrua, bungrua leh chhiattawkte tanpuina tur hmanrua te an supply thin.
World Medical Mission: 1977 a Dr Richard Furman leh Dr Lowell Furman te din a ni a. Mission Hospitals hrang hrangah Doctor thiam tak tak ten part time a hna an thawhtheihna tur a tana ruahman a ni a. Heng Doctor thiam tak tak te hi khawvel ram hrang hrangah Chanchintha puandarh pahin rawngbawlna hna an hunawlah te hmangin an fehchhuak thin ani. Tin World Medical Mission hian Mission Hospital hmun hrang hrang a supply tur Bungrua engemaw zah an chhek khawl reng bawk
Children’s Heart Project: He project hnuaiah hian ram rethei zawk, inenkawlna mumal hmu phalo te zinga naupang lung tha lo vei te an enkawl a. Chung naupang te chu North America ah hruai in Damdawiin lian hrang hrang ten a thlawn in an lo enkawl thin a ni. Naupang 500 chuang he project hnuaiah hian enkawl an lo ni tawh a ni.
HIV/AIDS Project: HE Project hian Kohhran hrang hrang te, Ram hnufual a sawrkar te leh Pawl hrang hrang te AIDS chungchanga hmalakna ah a pui a. Tin, Africa thalai maktaduai 2 chuangte hnenah AIDS leh a kaihhnawih thil zirtirin hun an hmang bawk ani.
Turn On The Tap: He projecy hnuaiah hian ram hnufual zawk te hnenah tui thianghlim in tur an pe a. Biosand Water Filters chu khawvel hmun hrang hrang 21 chuang ah siam sakin mi 6,00,000 chuang ten an hmang mek ani. Tin he project hnuaiah hian chhiatrupna thlenna hmunah tui thianghlim in tur te chhawpsakin ram hnufual te tui an laih chhuahsak a, tui thianghlim in thatna te an zirtir bawk a ni.
Combating Global Hunger: Tam leh khuarel chhiatrupna lo thlenna hmunah mipuiten ei leh bar an zawn theihna tur in he project hnuaiah hian huan siamte, sangha dil siamte, leh ranvulh kawngah te hma an lak pui thin.
Sudan Church Reconstruction: Kum 2005-a Comprehensive Peace Agreement, Sudan Sawrkar in a ziah hnu khan buai lai a Sudan ram ah Biak in tam tak tihchhiat a ni a. Chung Biak in tihchhiat siamthatna tura Samaritan’s Purse project a ni. He project an kalpui hnu hian Biak in 270 chuang an sak that sak tawh a ni.
Women’s Project: He project hnuaiah hian ram rethei leh hnufual zawk ahmeichhia te dihmun chawikan lamah hma lak a ni a. Lehkha zirtir, hmeichhe hriselna lam zirtir, kut themthiamna lam leh nawhchizawrh leh mihring hmanga sumdawn chungchangah te zirtirna pe in theih tawpin an tanpui a ni.
Samaritan’s Purse Sum khawih che vel hi kum khatah Dollar Maktaduai 300 chuang a tling a. Hemi atanga 88% hi Project hrang hrang ah a lut a, 5% hi Pawl in relbawlna leh in enkawl nan hman a ni a 7% hi sum dehchhuahna lama hmalak nan hman a ni. Heng sum chevel leh hmanna zawng zawng hi Dixon Hughes PLLC in an audit leh vek thin a, heng financial reports te hi Samaritan’s Purse website www.samaritanspurse.org ah hmuh theihin an chhawpchhuak reng bawk a ni
Christian Aid :
Christian Aid hi khawvel a tanpui ngai te tanpui a, mite dawmkang tu pawl lian ber te zing ami ani a. British Isles a kohhran lian tak tak ten kum 1945-a Indopui II-na a vanga raltlan te tanpui tur a an din ani. A din tirh chuan Christian Reconstruction in Europe ti a hriat ani thin a, Kum 1964 khan tun a a hming CHRISTIAN AID tih hian thlak alo nita ani. Christian Aid hian Headquarter London ah an nei a. Khawvel ram zau zawk ah rawngbawlna zar pharhin ram 70 chuang ah hnam rethei leh hnufual te tanpuiin an thawk thin a. Christian Aid hian hnam hnufual leh rethei tak tak te chu an sakhua, hnam leh an vunrawng te thliar loin a mamawh apiangte a tanpui thin aKum 2004-2005 phei kha chuan an sum lakluh ringawt pawh Million 80 vel lai a tling ani. Christian Aid logo a an ziah lan ang in an thupui chu ‘We believe in life before Death’ tih ani. Christian Aid hian mi rethei te tanpui hian kum 60 chuan hun an lo hmang tawh ani. Vietnam War
Christian Aid hian hnam rethei leh mi harsa te chu an harsatna thlen tu thil hrang hrang zirpuiin chumi lak a ta chhanchhuak turin sum leh pai mai nilo in rilru lam thlenga siamthat an tum thin a. Khawvel Sik leh sa inthlak danglam chho zel te, Ram hnuaihnung zawk te leiba ngah lutuk te leh sumdawnna a mirethei zawk te hlawkpui ve theih dan tur te an buaipui a. Trade Justice Movement ah member lianber pawl ni in Retheihna nuaibo na tur in hma an la nasa hle bawk.
United Kingdom-ah Christian Aid hian May thla chawlhkar hmasa ber dawttu ah Christian Aid week an hmang thin a. Envelope te siam in In tinah an khawn leh a. Tin, thilpek an dawn hrang hrang te zuarchhawng leh in kawng hrang hrangin sum an tuak bawk a. Chuta tanga mi thil pek tling khawm chu Christian Aid sum hmuh 20% lai te a tling thin ani. He week ah hian Kohhran 22,000 lai tang khawm in tun kum 2010 ah phei hi chuan £14 million lai inkhawn ngah theih an beisei ani.
Tuna Christian Aid hotulu ber CEO chu Loretta Minghella ani a Christian Aid hi April 2010 khan a rawn zawm ani. A hnathawh that avanga Order of the British Empire chawimawina hlan British Sawrkarin a lo hlan tawh, mifel leh taima chungchuang tak ani. 