Pathian tana Olympic Medal vuiliamtu leh China rama Missionary
ERIC LIDDELL
Kum 2012 Summer Olympic, London-a
nghah chu neih zawh a lo ni ta a, Olympic lunglen a la reh lo bawk a, chuvangin
tun tum chu Olympic-a Gold Medal lo la tawh, a hnua Missionary-a kalta Eric
Liddell-a chanchin hi i han bih ve dawn ila. Eric Liddell-a hian Olympic-ah
Gold pakhat leh Bronze Medal pakhat chauh a la a, tum khat chauh Olympic-ah a
tel a, mahse engatinge he pa chanchin hian ngaihven a hlawh a, khawvelin a
ngaihsan em em? Mi ropui tak takin medal tamtak an lo la thin tawh a, mahse
Eric Liddell a ang em em in an ropui ve lo. A chhan i han en dawn teh ang.
Pianna:
“Flying Scotchman” tia an sawi mai thin Eric Liddell hi January 16, 1902 khan
China hmarlama Tianjin khuaa Missionary Rev James Dunlop Lidell-a te nupa karah
a lo piang a, a pa Rev James Dunlop Liddell hi London Missionary hnuaia China
rama thawk a ni. Hetianga China rama awm an nih avang hian kum 5 anih thlengin
China-ah hian lehkha a zir ve a, kum 6 a trlin kumin a unaupa Robert-a nen
Missionary fate puala sikul siam Eltham College, Mottingham-ah a nu te chuan an
luh tur a, hetia Hostel-a an awm hlan hian a chhungte hi China ramah an
rawngbawl hna an thawk a, kum khatah vawi 2 chauh te an inhmu thei thin a ni.
Eltham
College-a lehkha a zirchhung hian Eric Liddell hi naupangte mah nise infiammi
tak mai a ni reuh a, tlan a theiin Football leh Rugby a thiam em em a. An
sikul-ah te chuan Best Athlete lawmman a dawng awl lo. Kum 16 a tlin chuan an
sikul Rugby leh Cricket team-ah te captain a ni der tawh a, Eltham College-a a
luh lai hian Scotland ram pumpuia tlanchak ber nihna a hlawh chhuak der tawh.
Hei vang hian chanchinbu te pawhin Scotland tana Olympic-a Gold Medal a la lak
thei mai an rinthu an ziak nasa hle.
Hetianga
Eltham College a a luh lai atanga a lar em avang leh Missionary fapa, Kristian
tha tak a nih bawk avangin Glasgow Students Evangelical Union (GSEU) chuan a
larna hmangtangkaia mi tam tak hip khawm theih inbeiseiin GSEU aiawha thusawi thurin an ruat ta a. GSEU
hian khaw hrang hrang fang turin mi 10 awmna team an siam a, chung GSEU team te
chuan rawngbawlna hmun hrang hrangah neiin Erric Lidell hi heng hunah hian
thusawitu berah a tang thin a ni.
Kum
1921 khan Liddell hian a unaupa Robert a zuiin University if Edinburgh-ah Pure
Science zir turin a insawn a. He University-ah hian Athletics leh Rugby chuan
ngaihsan a hlawhin ngaih pawimawh a hlawh hle. Hei vang hian Eric Liddell-a
pawhin ngaihven a hlawh nghal reng a ni. Tichuan Yard 100 leh yard 200
intlansiakah te a han tel ta a, University aiawhin Rugby Team-ah a tel bawk a,
Rugby-ah phei chuan a chetthat em avangin Scottish National Rugby Union Team-ah
thlan a nih phah nghe nghe a ni.
Intlansiak
lamah pawh pakhatna a ni chho ta zel mai a. Hetiang anih avang hian kum 1921
Olympic Paris khawpuia neih turah Great
Britain aiawha 100m, 200m leh 400m-ah te tlan tura thlan a ni ta.
Nasa
takin Liddell-a pawh a in puahchah ta a, tichuan khawvel ram hrang hranga
infiammi thei chung chuangte intihsiakna ropui Olympic-a intlansiak tur chuan
Paris khawpui a pan ve ta. He 1924 Olympic-ah hian Eric Liddell hi a che tha
hle mai a, 100 metre race tih lohah chuan medal a la ve ve a, 400 metre race-ah
Gold medal lain 200 metre race-ah erawh American mi Jackson Scholz leh Charles
Paddock te hneh loin Bronze medal a la thung a ni.
Pathianni
a serh: 1924 Paris Olympic-ah hian Liddell hi a telna 100m, 200m leh 400m ah te
medal la vek tura ngaih a nih laiin a chak berna 100 metre race-ah medal a la
ve tlat lo. Hei hi a chhan chu intlansiak hun hi Pathianni a nghah a nih vang a
ni. Olympic neih anih dawn hian Liddell-a hi heng intlangsiak bakah hian 4X100
leh 4X400 Relay race-ah te tlan tura tih a ni a. Mahse heng intlansiak neih hun
tur hi Sunday vek anih avangin Eric Liddell chuan chak tak chungin “Ka tlan
dawn lo” tiin a sawi mawl tawp mai a ni.Kristian chhungkua atanga seilian a nih avangin Liddell hian Sunday a ngaipawimawh em em a, he hunah hian thildang reng reng, Pathian chibai bukna chauh lo chu, ama hmingthatna tur pawh nise tih a duh ngai lo. 100metre race-ah pawh hian a tel chak em em mai a, mahse Pathianni-a neih tur anih avangin a tel ta lo a, intlansiakna kiang lawka Biak in pakhatah inkhawmin thusawina hun pek a ni a, a thusawi lai hian intlansiak tanna silai hmeh puah ri pawh chiang takin a hre thei a, tel sela chuan Meldal a la ngei dawn tih pawh a inhria mahse Eric Liddell-a chuan Pathianni bawhchhiata mahni hlawhtlinna leh hmingthatna um ai chuan Olympic Medal chu Pathian ropuinan a vui liam a, a hunlaiin chan angin lang mahse a hnu zelah Pathian tana a channa hi khawvelin amah an ngaihsan phahna a ni ta hlauh zawk a ni.
Olympic
neih zawh anih hnu hian Eric Liddell-a pawh Edinburgh University atangin a
graduate ta bawk a, intlansiak erawh a la chhunzawm zel. Sawi tawh angin Pathiannia intlansiak tur
anih avanga a tel duhlohna pakhat 4X400 metre race chu Olympic zawh hnu hian
Great Britain leh USA in inelna nei lehin hetah hian Olympic-a pakhatna
American team chu Liddell-a te hian an hneh a ni. Hetiang taka intlansiak lama
miropui hi a pian leh thihna ram China chuan China hminga Olympic Gold la hmasa
bertu niin an la ngai reng a ni.
China ramah: Hetianga infiamna lama
theihtawpa a inhman a, lawmman chi hrang hrang a hui chung hian Eric Liddel
hian hringnun hi intlansiakna mual hmuhin a hmu a, Vanram luh theihna tura
intlansiak mek anih inhre chungin Missionary hna thawk turin China ram a pan
leh ta a. Liddell-a chhungte hi, sawi tawh angin China ramah hian Missionary
hnathawkin an lo awm sa a. Kum 1925- 1943 chhungin China ramah hian a thawk a
ni.
China
rama Missionary hnathawk tura a kal hnu hian a hna hmasa ber atan Chinese mi
hausa fate ho luhna Anglo-Chinese College-ah zirtirtu hna a thawk a. Liddel-a
hian heta a thawhchhan chu Chinese mi hausa leh milian takl tak fate zirtirna a
pek a, chumi ruala Kristiana a siam chuan midangte hnenah chung naupang te
chuang nghawng lian tak a neih a, Kristian sakhua thehdarhna tha tak a nih
theih a rin vang a ni. Zirtir hna piahlamah Liddell-a hian sikul naupang te chu
Athletics lama a lo tawnhriat tawhte hmangin zirtirna a pe thin bawk a ni. Hna
hrang hrang a thawk a, chumi pah chuan a pain Pastor hna a thawhna Union
Church-ah Sunday School Superintendent hna a chelh thin bawk.
Hetiang
hian kum 1925 atangin thahnemngai takin a thawk char char a. Kum 1932-a
furlough-a a haw tumin Pastor atan ordained a ni ve ta. He Furlough atanga
China rama a haw leh hnu hian a hna ngai bawk chhunzawm lehin kum 1934 khan
Tianjin hmuna Canadian Missionary te fanu Florence Mackenzie nen an innei ta a
ni.
Hetianga
tul tak leh thahnemngai taka a thawh lai hian Indopui II-na a lo thleng a, kum
1941 a lo herchhuah phei chuan Japan ral chu China vela a len em avangin
British sawrkar chuan British mi China rama awm te chu China chhuahsan vek
turin thu a pe a. Hei vang hian Liddell-a nupui raipuar teuh tawh Florence-i
leh an fanu pahnih te chu Florence-i te ram zawk Canada lam panin an haw ta a,
hetih lai hian Liddell-a erawh chu haw ve duh lo vin mi rethei te hnena
rawngbawlna hmun leh a unaupa Robert-a’n doctor hna a thawhna Xiaozhang Mission
Station-a thawk chhunzawm turin a inpe ta a ni.
Liddell-a
thawhna thar Xiaozhang Mission Station hi Chinese mipuiin an bawh nasa em em a,
hei vang hian bungrua leh mihringah indaih lohna a nasa in a thawktute pawh an
chau hle a, Liddell-a ngei pawhin a chauh phahin a hriselna pawhin a tuar hle.
Chinese
Eight Route Army leh Japan Sipai indona chuan zual lam a pan zel a, Japan ho an
lo pawng zel bawk a, tichuan kum 1943 khan Japan sipaite hian Xiaozhang Mission
Station pawh hi an awp ta. Hei vang hian kum 1943 khan Liddell-a hian a hmaa a
lo thawh tawhna bawk Tianjin lam chu a pan leh ta a. A hnuah indo avanga
Chinese Civil mite Janpan hoin an khungkhawmna Weihsien Internment Camp,
Weifang-ah chuan tan tir a ni ve ta a, he hmunah hian mi 1800 chuang tangin
China Inland Mission hnuaia thawkte pawh an tang ve a ni. Weihsien Internment
Camp-a dah luh a nih ve hian Liddell-a rawngbawlna a dal lo hle a, tang dangte
hnena rawngbawlna remchangah Pathianin a dah niin a ngai hmiah mai. Liddell-a
chu tang zinga an hotupa ber atan ruat a ni a, upate tanpui hna te, Bible class
neihte, infiamna lam kalpui te leh naupang ho hnena Science subject zirtir hna
te a kalpui thin a, Naupang ho chuan Uncle Eric tiin an ko thin a, mi zawng
zawngin an ngaina thin hle.
Eric
Liddell-a hi Pathian rawngbawl hnaah hian a tui em em a, Pathian hmangaihna chu
a nunah a langchhuak a, thahnem a ngai thei em em a ni. A nungchang mawi zia
leh a nelawm zia te, rawngbawlnaa thahnem a ngaih zia te chu he Weihsien
Interment Camp-a a tan laia awm te hian an sawi nasa hle thin. ‘The Courtyard
of the Happy Way’ ziaktu Norman Cliff-a, Weihsien Internment Camp-a tang ve
pakhat phei chuan a lehkhabuah, “Liddell-a hi Kristian tlangval nungchang mawi
ber zing a mi a ni a, amah nen kan tang dun thei kha ka lawm ngei mai. Camp-a
kan awm dun lai hian midang chanchin a thalo zawnga a sawi ka hre ngai lo va,
tawngkam hriat hrehawm a sawi ka hre ngai lo,” tiin a ziak hial a ni. Chutiang
bawkin he camp-a awm ve thin a hnua American Theologian lar tak nita Langdon Gilkey
pawhin, “Tlai tin mai hian chauh hmel em em, mahse phur tak siin tang dangte
Krista hnena a hruai theih dan tur ngaihtuaha hun a hmang lai hi ka hmu thin a.
Midangte hmangaihna leh nun duhawm chungchuang tak a nei reng a ni. Amah kha mi
thianghlim (saint) zingah pawh chhiartel nimahse thil awmlo a ni miah lo ang,”
tiin a sawi hial a ni.
 |
| Weihsien Internment Camp |
Ni,
Eric Liddell-a nunah hian entawntlak tak tak sawi tur a tam a, mahse kan sawi
vek seng lo ang. Weihsien Internment Camp-a a tan lai khan great Britain hminga
Olympic Gold medal hial lo la ve tawh tu a tang ve mai chu hrethiam lo vin
British Prime Minister hmingthang Sir Winston Churchill-a khan Japan nena tang
an inthleng tumin he camp atanga chhuah theihna dan kawng a hawn sak a. Mahse
Eric Liddell-a chuan a aiah nu pakhat raipuar teuh tawh chu a chhuah zalen tir
ta zawk a ni. (He thu hi kum 2008 Beijing Olympic neih anih dawn khan Chinese
thuneitu te chuan an puang chhuak chauh a, hei hi Eric Liddel-a chhungte pawhin
hre ve chauhin mak an ti hle)
A
hun tawp lam: Weihsien Internment Camp-ah hian rawngbawlin Eric Liddell-a hian
a hun a hmang zo a, chhuah zalen anih hun atan thla 5 chiah a la awm tihah
February 21, 1945 khan a thi ta a ni. A
thih hma lawk hian a nupui hnena lehkha a thawnah Eric Lidell-a hian hna a
thawh nasat lutuk avangin Nervous Breakdown a nei niin a sawi a, mahse a thih
hnua Autopsy result atanga a landan chuan ei chhiat luat vang te, hnathawh
nasat lutuk avang leh Brain Tumour vang niin sawi a ni. Langdon Gilkey-a vek
khan a lehkhabuah, “Eric-a thih tuk atang hi chuan kan awmna Camp pumpui maiin
hrehawm kan ti em em a, camp chhung chu a reh ruih mai a ni,” tiin a ziak.
China
rama Missionary ropui tak Eric Liddell-a ruang chu a thihna hmuna Japanese
Officer quarter hnungah phum a ni a, he hmun hi kum 1989 khan hmuhchhuah a ni
leh ta chauh a ni. Eric Liddell-a thlan awmnaah hian kum 1991 khan Edinburgh
University hmalaknain a hriatrengna lung phun a ni a he thlanlungah hian Isaia
40:31 thu, “Lalpa nghaktute erawh chuan an chakna chu an siam tha leh ang a;
mupuite angin thlain an thlawk chho vang a; hah lovin an tlan ang a; chau lovin
kein an kal ang,” tih chu mawi taka ziak a ni.
Chariots
of Fire: Eric Liddell-a nun hian mi tam tak a khawih a, Medal ropui tak dawng
thei dinhmuna a din laiin Pathian a ngai pawimawh a, chawlhni serh a duh vangin
a beisei em em Gold Medal chan huamin Pathiannia intlansiakah a tel duh lo ngam
a, chu chu a mah tiropuitu a lo ni reng zawk a ni.
Kum
1981 khan 1924 Olympic-a Eric Liddell-a’n Pathianni a intlansiak a duh loh
chungchang leh a ma mimal nun behchhanin film ropui tak Chariots of Fire chu
siam a ni a, he film hian Oscar Award ah nomination 7 hmuin Oscar hi 4 lai a
dawng nghe nghe a ni.
Camp
atanga a chhuah theih laiin Camp chhunga tang te hnena rawngbawl zawl a duh
avangin a aiah nu pakhat raipuar a chhuah tir a, a ni chuan Pathian
rawngbawlin, a fanu naupang ber Maureen Lidell pawh hmu hman lovin Japan sipai
ten an hrenna hmunah chuan Pathian ram tul vangin a lu a phum ta a. Hei vang
hian Eric Liddell-a chanchin hi a dai tawh ngai dawn lo va, rangkachak aia hlu
zawk Pathian a neihna chuan tun thlengin thangtharte thinlungah thu a la sawi
reng a ni
No comments:
Post a Comment