Wednesday, August 8, 2012


India International Player
LALRINDIKA RALTE (Didika)

India ramah hian mihring .... chuang kan cheng a, China dawtah khawvela mihring tam berna kan ni. Hetiang zozai zing atang hian a tha emaw a chhe lamah emaw a ber nih hi thil har tak a ni a, a tha pawl emaw a chhe pawl emaw zinga thlan nih pawh thil har chungchuang a ni. Chutih laiin tuna a chanchin kan sawi tur Lalrindika Ralte erawh hi chu a thianpa Jeje Lalpekhlua nen India rama Football thiam zual mi 22 zingah a tel a, India aiawhin hmun tam takah an lo fehchhuak tawh a, tun dinhmunah chuan India player hot ber pawl an ni. (Didika khelhpui India International Player Jeje Lalpekhlua erawh chu a chanchin kan lo chhuah tawh kha) Awle, Indian Winger tha, Mizo hming ti thatu Pathian tih tlat mi leh inkhelthiam bawksi Lalrindika Ralte (Didika) chanchin chu i han bihchiang dawn teh ang.

            Pan lai nun: Kum 20 chuang kalta khan Electric Veng Lunglei-a Pu Rohmingthanga Ralte leh Pi Lalmuanzuali te chuan an fa pahnihna an hrin tep tawh avangin kawng tinrengin an inbuatsaih a. Fa u berah hmeichhia an neih tawh avangin Pu Rohmingthanga te nupa chuan fapa neih inbeisei tak chungin an hmalawka nau lo piang tur chu mipa nge anih ang hmeichhia tih an ngaihtuah ve nasa hle. A enga zawk zawk pawh nise fuke kima a pian phawt chuan a tha vek mai tia an inngaihtuah lai chuan Pi Muan-i chuan kum 1988 January 6 khan fapa duhawm tak mai a hring ta a, a hmingah chuan Lalrindika Ralte tih an sa ta nghe nghe a ni.
            Nikhua a lo rei a, Didika pawh chu a lo thanglian ve ta zel a, mipa naupang harh leh tho thang tha tak niin JNM School-ah zirna run a rawn bel ve tan ta. Naupan lai atang rengin Football a atchilh nghal a, a rualpui te zingah pawh a khalh pup pup chi nilo mahse a thiam pawl tak chu a ni chho ve zel. Tichuan JNM atanga Primary a zawh hnuin BMS School-ah Middle School a lut leh a, heng hunah te hian School sport leh Zonal Sport velah te Football a lo pet ve zak zak tawh thin a, Under 16 tournament leh tournament dangah te Veng aiawha khel chhoin a tournament khelh hmasak ber chu 2nd Bn MAP in Luangmual Field-a U-16 tournament an buatsaih kha a ni.
            Lehkha zir lamah pawh a rual pawl tawk a ni bawk a, a pass chho ve zel. Bethlehem Middle School atanga pawl sarih a passed hnu chuan High School kal turin Govt Venglai High School-ah a insawn ve leh a, he school hi tun dinhmuna a din theihna tur atana kailawn pawimawh tak a ni ta.
            Hlawhtlinna kailawn chu: Kum 2004-a Venglai High School-a a luh lai hian Lunglei District High School Football tournament neih a ni a, hetah hian Didika pawh hi an school aiawh a khel tura thlan a ni a. Tournament chu khel chhoin Final-ah an chaklo ta hlauh mai. Mahse he tournament-a player tha tha chu a hnu lawka GAIL MZP Cup-a Lunglei aiawh tura thlan an ni a, chung zingah chuan Didika pawh hi thlan a ni.
            Kum 2004 February thlaah chuan GAIL MZP Cup khel tur chuan Didika te team chuan beiseina sang tak nen Aizawl an pan ta. Mahse vanduaithlak takin Lunglei team te chu he tournament Group Stage-ah an tla ta hlauh mai.
            He tournament ah hian vanneihthlak tak maiin IFA Football Academy in he tournamenta Mizo naupang talent nei tha zual te thlang tura a tirh IFA Scout pakhat chuan he tournament chhunga naupang talent nei tha deuh te chu a lo chhinchhiah kauh kauh a. Mizo naupang football thiam tak tak 13 a thlan zingah Group Stage chauh khel hman Lunglei Team atang chuan Didika chu hepa hian a thlang ve ta kauh mai.
            Tichuan chung Mizo naupang 13 te chu Kolkatta-ah trial tura hruaithlak an ni ta. Hetah hian IFA lam hian India ram hmun hrang hrang atangin naupang football lama talent nei tha 3,000 chuang teh meuh mai an lo hruaikhawm a lo ni a, tlin chu huphurhawm ru ve tak a ni. Tichuan Salt Lake Stadium-ah kawng hrang hrangin naupang ho thiamna chu an han zirchiang a, a tawpah chuan naupang 3,000 chuang atang chuan naupang 30 thlang chhuakin Didika leh Mizo naupang dang 3 te chu thlan an ni ta a ni.
            Tichuan Didika te ho chu chu IFA Football Academy, Haldia, West Bengal-ah training nei turin an inpu lut ta. He Academy hi India rama Football Academy tha ber pawl niin an Instructur/Coach pawh Tata Football Academy lama kum 16 chuang zet lo thawk tawh leh S. Malsawmtluanga te ho lo chher chhuaktu, India Striker tha ni thin Mohammad Habib-a a ni. Habib-a hnuaiah chuan Didika te ho chuan Football chu a bulthut atangin an han zir chho tha leh ta. Zing leh tlaiah practical class nein chhun lamah English leh Hindi leh thil dangte zirin School an kal tha ve leh bawk a, an thawkrim hle.
            Hetia IFA Academy lama an zirchhung hian kum khatah thlakhat te chawlh an nei ve thin a, mahse naupang tlei thei tih takah a lung erawh a leng vak ngai lo niin Didika hian a sawi. He Academy-a an zir chhung hian an tih that vak loh leh Coach mit an tlun loh chuan Drop theih reng an nih avang chuan an tang thei em em a, mahse tawng thiam loh leh khawlum em em mai chu hrehawm a ti ve tak zet a, mahse hlawhtling tur chuan chung hrehawm leh hahthlak chu a tuarchhuah a, a paltlang ngei a ngai tih a hre si.
            A hlawhtling chho tan: IFA Academy-a a zirchhung hian Football lama thuneitu lian te chuan Didika talent ‘bon’ zia hi an hmuhhmaih hauh lo a, India aiawha U-16 a khel turin an ko tan ta. Tichuan India U-16 camp-ah te chuan kum hnih chuang a han insawn leh rih a, kum 2007-a Saudi Arabia-a neih AFC U-16 Qualifier-ah chuan India aiawhin a khel ta. Hetah hian India chu qualified in kum 2008 khan AFC Championship chu an khel a, Didika pawh hian India tan pet goal zak zak mahse vanduaithlak takin India chu Group stage-ah an tla ta hlauh mai. India U-16 team-a a khelh lai hian khawvel hmun hrang hrang Germany, Saudi Arabia, USA, Uzbekistan leh England-ah te inkhelin an zin a, England-ah phei hichuan Man Utd leh Everton Junior team te nen an inkhel nghe nghe a ni.
            India U-16 Team-a a khelh hnu hian IFA Academy lamah a let leh a, hun engemawchen a zirna a chhunzawm leh hnuin kum 2009 khan Academy-a a zirna chu a zo fel ta a, he Academy-a  zirlai zingah hian a ti tha pawl niin Grade A a hmu a ni.
            IFA Academy atanga a zir zawh hnu hian India under 19 team-ah AFC U-a19 Qualifier khel tura koh a ni leh nghal a, tichuan he Qualifier hi Iraq-ah zuk khelin vanduaithlak takin an qualify zo lo.
            He AFC Under-19 an khelh zawh veleh hian I League team lar Churchill Brothers chuan Club lian dang chuh pui luai luaina karah Didika chu kum 2 leh a chanve chhung atan Contract a lo sign pui ta a, mahse kum chanve vel chauh a khelh hnuah India rama football in hma a sawn theih nana thuneitu sang ten an din Indian Arrows chuan India rama player tha tha la khawmin Didika pawh hi Churchill Brothers atang hian kum 2010-2011 season chhung khan loan in a la chhuak ta.
            Indian Arrows-a hmingtha taka a khelh hnuin kum 2011-12 season chu contract a ziahpui Churchill Brothers lamah a hmang ve leh ta. Han let leh lawk ila, kum 2009-a AFC U-19 Qualifier atanga an tlak hlim hlawt khan India U-23 team-ah koh a ni leh nghal a, Indian Arrows leh Churchill Brothers-a a khelh chhung han India U-23 team tan Sri Lanka, Bangladesh, China, Oman, Qatar leh Myanmar-ah te inkhelin a fehchhuak zak zak a ni.

            Indian Arrows atanga Churchill Brothers-a a let leh hma chiah hianUAE-a World Cup Qualifier khel turin India Senior Team-ah koh a ni ve ta a, India Senior Team tan hian Maldives, Dhubai, Barbados, gayana, Trinidad & Tobago leh Nepal-ah te inkhelin a a fehchhuak zak zak a ni. India Senior Team-a a khelh hnu hian thil chhinchhiah tlak tak chuan SAAF Cup-ah Afghanistan hneha an champion kha a ni awm e.
            
           Hriatreng tlak inkhel: Didika favourite footballer chu Zinedine Zidane leh Cristiano Ronaldo te an ni a, India player zinga thiam a tih ber chu Baichung Bhutia a ni. Kumin(?) khan Bhaichung Bhutia thlahna atan Audi sponsored in Bayern Munich team leh India Team chuan Delhi-ah Exhibition Match an khel a, hetah hian Didika pawh a tel ve. Hei hi ropui atih thu hahipa sawiin Didika chuan TV vel chauha a lo hmuh thin leh thiam a tih em em, engtikah mah a khelhpui ang tih a rin ngai loh Arjen Robben te, Mario Gomez te, Schwazteinger te ho chu Jawaharlal Nehru Stadium, New Delhi-ah a inkhelhpui ta mai chu mumang ang zawk hial a tih thu a sawi. Inkhelh mai bakah hian heng players ropui tak tak te nen hian Dinner te ei hovin thla an la ho a, hmaichhanah an inkawm a, a tukah ball an inchuh leh riap riap mai bawk a nih kha. Hei hi Didika chuan a hun tawn zinga ropui a tih ber pawl niin a sawi.
            Hlawhtlinna chungchuang!: Tichuan Churchill Brothers atang hian hmanni lawk khan East Bengal chuan Didika hi kum hnih chhung atan cheng nuai 100 chuang hlawh turin contract an sign pui ta. Tihian kum khatah Nuai 50 chuang Didika hian a hlawh dawn a, a tumruhna leh a tawrhchhelna te chuan dinhmun sang takah a vawrh chho ta a ni.
Didika leh keimah
            Kristian tlangval Didika: Naupang nungchang tha ni thin Didika chuan tun dinhmun hruaithlengtu hi Pathian a ni tih hi engtik laimahin a theihnghilh ngai lo a, nitin Bible chhiara Pathian hnena inhlanna khunkhan taka a hman ziah thu a sawi. A bible chang duh ber chu Sam 23-na Min vengtu chu Lalpa ani tih leh I awmdan tur chu Lalpa chungah nghat la, amah chu ring la, a man a ti vek ang tih te an nih thu a sawi a. Inkhel tura Stadium an pan kawngah a iPod hmangin Mizo zaipawl hla sak hrang hrang te chu mahni inrintawkna a neih theih nan a ngaithla thin a, Bawngkawn Zaipawl hla phei chu a ngaihthlak nasat ber a nih thu a sawi.
            Didika hian sawma pakhat pek hi a ngaipawimawh em em a, Academy-a an awm lai a thlatin Rs 300 lek stipend an lak lai pawhin heng stipend an lak tlemte atang hian sawma pakhat chu khawl hrang nghauh nghauhin kum tawpah an awmna hmuna vai Kristian kohhran pakhatah an va chhung lut thin a ni. Academy-a a awmlai atanga tun thleng hian Didika hian sawma pakhat pek hi a ngai pawimawh em em a, phal taka Pathian a pek thin chu thilpek kawnga fiah chotu Pathian chuan malsawmin tunah chuan Mizo Footballer zinga hlawh tam ber pawlah a hlangkai ta.
            Thalate hnena a chah duh chu tumruhna, Pathian tihna leh taihmakna a nih thu Didika hian sawiin “Tumruhna tel lo chuan a hlawhtlin theih loh a, tumruh ringawt mah ila kan taihmak chuan siloh chuan awmzia a awm lo. Tumruhin taima hle mah ila Pathian kan tih loh chuan hlawhtlinna tak tak kan tawng thei lo a, chuvang chuan hlawhtling turin Pathian tihna, tumruhna leh taihmakna hi a kalkawp tlat a tul a ni,” tiin Didika chuan a sawi.
            Kohhran ho leh Football lovers te tawngtai sak thinna chu a hlawhtlinna bul ber anih thu Didika hian sawiin inkhel tam tak leh pressure sang taka a khelh chhohna turah tawngtaipuina nasa zawk a mamawh tih a sawi a, mihring theihna tlemte piah lamah tawngtaina chauh chu a chakna neihchhun a ni tih sawiin thahnemngai taka tawngtai sak thin turin in ngen a ni.

1 comment: